Mar 16 | ENQ | STEP | Sambasa gii doko pateamopa Matia Makatala tange dokopi, Matia Jemesa endangi dokopi, enda Salomipi dutupame Jisasa kai pyala mona latala welepi opale tunduma pingi mendapua sambeami-pyaa.

a16:1Lu 23:56; Jo 19:39

b16:5Mk 9:3

c16:6Mt 2:23

d16:7Mt 26:32, 28:7; Mk 14:28; Jo 21:1-23

e16:9Lu 8:2

f16:10Mt 28:10; Lu 24:10-11; Jo 20:18

g16:141 Ko 15:5

h16:15Ais 52:7; Mk 13:10; Lu 24:47; Jo 20:21; Ap 1:8; Kl 1:23

i16:15-16Mt 28:18-20

j16:16Ap 2:38

k16:17Mt 10:1; Ap 2:4, 8:6-7, 10:46, 14:3

l16:18Lu 10:19; Ap 28:3-6

m16:19Ap 1:9-11, 2:33-34; 1 Ti 3:16

n16:20Ap 14:3; Ip 2:3-4

Mark 16

Jisasa malunya sakateamo doko

(Mt 28:1-8; Lu 24:1-12; Jo 20:1-10)

1 Sambasa ^a gii doko pateamopa Matia Makatala tange dokopi, Matia Jemesa endangi dokopi, enda Salomipi dutupame Jisasa kai pyala mona latala welepi opale tunduma pingi mendapua sambeami-pyaa. 2 Sandeenya yongama wamba niki pyakaya-kaita malu dokonya peami-pyaa. 3 Dupame pao pituu, “Malu kambu dokonya kana piti petae doko apimi kapilya mina-mina pyoo nyakata laape?” lao mende lamai lamai pyoo peami-pyaa. 4 Pupala kandeaminopa kana doko nyoo kapya latae sia-pyaa. Kana doko etete andake mende-pyaa. 5 Enda ^b dupame malu dokonya kolandatala akali yonge pee londe kyoo lapae pingi mende kingi tolae-kaita pilya siasa kandatala mona andao walu leami-pyaa. 6 Dopa ^c piaminopa baame enda dutupa lamaiyoo, “Nyakama mona andao walu nalalapape. Jisasa Nasatete tange ita pokonya pyao yukuiyamino doko nyakamame kutilyamino. Baa sakatatalame lamo. Angenya nasilyamo. Baa seteamino panda dake kanjepa. 7 Nyakamame ^d pupala baanya disaipele dupapi Pitapi lamaiyoo, ‘Baa wambao Galili yuu dokonya pelyamo. Wamba baame nyakama langiamoli pyoo nyakamame baa Galili yuu dokonya kandatamina,’ lamaiyepape,” lea-pyaa. 8 Enda dupame kamanda pyakalyetala malu doko yakinatala mona andao walu lao paka peami-pyaa. Dupame paka kayamino dokome endakali mende lamaiya nayami-pyaa.

Jisasa baa Matia Makatala tange dokome kandena lao paneamo doko

(Mt 28:9-10; Jo 20:11-18)

9 [Sandee ^e gii dokonya yongama wamba Jisasa sakatatala Matia Makatala tange dokome wambao kandena lao panea-pyaa. Wamba enda doko-kisa enjele koo kalange paleamopa Jisasame watao pyakamaiya-pyaa. 10 Jisasa-pipa ^f awapa kateamino endakali dupa ee lao yamataka lao peteaminopa, enda dokome pupala dokaita lamaiyoo, “Jisasa lenge tao katamupa nambame kanjona,” lea-pyaa. Dopa leamopa dokaitame sepala pii doko kiningina lao masala nayami-pyaa.

Jisasa baa disaipele lapomame kandena lao paneamo doko

(Lu 24:13-35)

12 Maitakao disaipele dupanya lapoma yuu taono doko yakinatala peambinopa dolapome kandena lao Jisasa waka joo peambino dokonya pea-pyaa. 13 Dolapome pupala disaipele yangi dupa lamaiyambinopa dolapome kiningi lelyambinona lao dupame masala nayamiaka-pyaa.

Jisasa baa disaipele dutupame kandena lao paneamo doko

(Mt 28:16-20; Lu 24:36-39; Jo 20:19-23)

14 Maitakao ^g akali kingi ita mende-kisa dee mendai dutupa nee nao peteaminopa Jisasa baa dokaitame kandena lao ipao panea-pyaa. Dopa petala baa sakatatala paneamopa kandeamino endakali dupame kiningi lelyaminona lao masala nayamino dokonya dokaita pyalanya lao, “Nyakamame kiningina lao masala naenya, tuu pyoo mona pyakilyoo kalyaminona,” lea-pyaa. 15 Dopa ^{h
,} ⁱ latala baame dokaita lamaiyoo, “Nyakamame yuu dupa pitakanya pupala Wai Pii Epe doko endakali dupa pitaka lamaiyepape. 16 Masoo ^j minao kaimbu nyetamo endakali doko Goteme pyoo nyeta. Masoo minala nayatamo endakali doko daa latala watao pyata. 17 Masoo ^k minatamino endakali dupame kongali datupa pitami. Dupame nambanya kenge doko lao enjele koo dupa watao pyatami. Dee pii tata waka dupa latamiaka. 18 Kanopato ^l salenda dupa kingimi minatala koyala nayatami. Tomakai dupa napala kumala nayatami. Endakali yaina pyapae dupa kingimi minataminopa yaina dupa mee jetamina,” lea-pyaa.

Goteme Jisasa kaiti-kisa lanyiamo doko

(Lu 24:50-53; Ap 1:9-11)

19 Kamongo ^m Jisasame pii dutupa lamaitiamopa Goteme baa kaiti-kisa lanyia-pyaa. Dopa piamopa baa Gotenya kingi tolae-kaita kalyamo. 20 Disaipele ⁿ dupame yuu dupa pitakanya pupala pii doko lamaiyami-pyaa. Dopa piaminopa Kamongo dokome nyakama-pipa kalai awapa pyoo kongali piamino dupanya baame pii doko angi injisia-pyaa.]